حاجة غريبة

حاجة غريبة أوى حصلت يوم الخميس إللى فات هى إللى خلتنى أبتدى أكتب. الفكرة دى كانت فى دماغى من زمان بس كل ما آجى أبتدى فيها أرجع فى كلامى مش عارف ليه
المهم ماطولش عليكم يوم الخميس و أنا راجع من الشغل و راكب الأوتوبيس (بتاع الشغل طبعاً ما هو أنا زى باقى الشباب إللى بيقولوا إنهم ما بيركبوش أوتوبيسات النقل العام –و مع ذلك الأوتوبيسات دايماً مليانه – حاجة غريبة أمال مين إللى بيركبها) ماعلينا الموقف بالظبط

نهار خارجى الساعة 5 بعد الظهر
الطريق : من برج العرب حتى سيدى بشر -الإسكندرية
البطل (إللى هو أنا طبعاً) جالس على المقعد المخصص له فى الأوتوبيس بجواره أحد الأصدقاء (إللى نايم طبعاً –ما هى السكة ساعتين و رايحيين جايين فيها كل يوم لما طلع روحنا-) و البطل مش جايله نوم قال يتسلى فى أى حاجة قام مطلع الموبايل يشوف مين إللى إتصل بيه خلال الإسبوع إللى فات و هنا حدثت الكارثة.........

إكتشفت إن ماجانيش طول الإسبوع غير تليفونين بس و الإتنين بخصوص الشغل يعنى مافيش و لا واحد صاحبى عبرنى. قلت أبص على الميسدات لاقيت إن ماجاليش غير 5 ميسد كول طول الإسبوع (ملحوظة : أنا كان ال 10 أماكن بتوع الميسد مش بيكفونى فى اليوم)
و ساعتها إفتكرت إن تليفون البيت مضربش طول الإسبوع
حاجة غريبة أمال كل صحابى بتوع زمان راحوا فين؟؟؟؟؟
ساعتها بس قررت أكتب
11/2/2006