مش أنا دخلت الحجز

الموضوع ده عدى عليه 5 أيام دلوقتى و أنا مكسل أكتب
المهم النهارده رجعت من الشغل الساعة 7 و إكتشفت إنى ماكلتش حاجة طول اليوم و عايز آخد دش و عايز أنام و عايز أكتب يووووه كل ده. دخلت أخدت دش و عملت ساندويتشات ماهى دى الحاجه الوحيده اللى بعرف أعملها
أكلت السندويتشات و لسه جعان كملت الأكل بشوية شيكولاته وشربت موز باللبن و حاسس إنى عمال أتخن بس هعمل إيه ؟؟ حبست بكوباية نسكافيه و دخلت حلقت ذقنى و قلت أقعد أكتب بأه
نرجع لموضوع الحجز

أخيرأً قدرت أطلع الرخصة
فى مصر غمزت الراجل اللى بيختبرنى بخمسين جنيه و خلص الحوار هنا بقالى أكتر من 3 شهور بدور على حد يأخد 1000 ريال و يطلعلى رخصة مش لاقى ماهى الناس هنا شبعانه ما علينا طلعت الرخصة و رجعت على الشغل مزقطط
خلاص يا جماعه طلعت الرخصة عايز عربيه بأه
بس كده
تلات أيام و كانت معايا نيسان صنى
نازل أصيع بالعربيه فى الشارع
و أوبه طاااخ
دخلت فى عربيه تويوتا كريسيدا سايقها واحد فلبينى دخل فى تويوتا كورولا سايقها واحد سعودى دخل فى نص نقل سايقها باكستانى يعنى ماسبتش جنسية فى السعودية فى حالها
نزلت م العربية و قلت هتقطع ضرب لقيت الناس اللى خبطتها كلها بيطمنوا على بعض و علىّ و كله تمام

صورة الحادثة

المهم السعودى إتصل بالشرطة و وقفنا نستنى لما تييجى و إتصلت بالشغل جاللى صاحبى المصرى و المدير بتاعى الفلبينى

صورة المرحومة

جت الشرطة
فين يا عم أوراقك
إتفضل سعادتك آدى الرخصة و الإقامة و رخصة العربية و التأمين ميه ميه يابيه

الله أمال فين التفويض
تفويض إيه يابيه
السياره بإسم الشركة لازم تفويض عشان تركبها
أوووبه طب يا بيه خمس دقايق و تييجى الورقة من الشغل
يبقى تشرفنا لغاية الورقة ماتيجى
و ركبت عربية الشرطة

و أنا بركب سيارة الشرطة

أنا داخل سيارة الشرطه

و راح صاحبى على المكتب يجهز التفويض و أنا رحت على المرور و قعدت على كرسى عشر دقايق كده و إتنده إسمى
إتفضل معايا
و دخلت الحجز
الحجز بأه عباره عن كام أوضه كده و كل أوضه قاعد فيها تلاته أربعه مش أكتر و طبعاً كنت عايز أدخل الحمام
الحمام بالنسبه لإنه حمام حجز فهو نضيف و كل شويه بييجى عامل ينضفه

صورة أحد غرف الحجز ......... الغرفه خاليه لأن المحجوزين كانوا بيصلوا العشاء فى غرفة أخرى

مستنى صاحبى يخلص التفويض و ييجى قلت أسلى نفسى و أقعد آخد شوية صور على ما الناس تخلص صلاه

ذكرى بالعربى ........ واحد بيتمنى إنها تكون حبسه مفعمه بالحركة و النشاط و الحيويه نياهاهاها

ذكرى واحد أفغانى

غالباً دى ذكرى بالهندى

الناس خلصت صلاه قعدت أتعرف على الجماعه السعوديين و كل واحد محجوز أد إيه و ليه و كده و بتاع و شاى بالنعناع
ما علينا صاحبى و صل و لاقيته طالعلى الحجز و فكه من الدنيا كلها و قعد يصور فىّ

أنا فى الحجز

إيه يا معلم الأخبار
أبداً إديتهم الورقه و مش عايزين يطلعوك م الحجز
ليه يافقر
أصل العسكرى اللى كتب التقرير الله يكرم دين اللى جابت أمه كتب فى التقرير إن سبب الحادثة سرعة لا يغطيها التأمين و بقيت عايز إن الشركه تقدم ورقه تضمنى فيها إن التأمين لو مدفعش و طبعاً مش هيدفع ماهو العسكرى الله يكرم دين اللى جابت أمه طلعهم براءه من الليله كلها يبقى يضمنونى إن أنا أدفع و بكده أنا اللى لبست الشغلانه كلها و دى يطلعلها كده أد مرتب تلات أربع شهور
و بما إننا يوم الأربع و بما إن الخميس و الجمعة أجازة يبقى أنا لبست حجز لغاية يوم السبت
ما تتصرف يا فقر إنت جاى تصورنى و تمشى
طب إستنى أنزل أحاول معهم تانى
دقيقتين و طلعلى
هات إقامتك
خد
دقيقتين تانى و لقيت ظابط طالع و بينادى على إسمى
سلمت على الإخوه المساجيين و خرجت
الظابط قاللى حمدالله على السلامة
و خرجت
صاحبى قاللى إنه سابلهم الإقامه لغاية ما أجيب ورقة الضمان من الشركة
الشركة لسه ما عملتش ورقة الضمان
بقاللى خمس أيام ماشى من غير إقامه
و يمكن أتمسك و أترحل و التدوينه اللى جايه أكتبها من مصر
يا عالِم