إعتذار علنى للأستاذ المخرج محمد خان

أنا مش عارف أنا إيه اللى بعمله اليوميين دول بس واضح إن مشاكلى فى الشغل بتأثر على كل حاجه بعملها

آخر تدوينه كتبتها كانت طريقتها مبتذله جداً و مش عارف أنا ليه عملت كده

معظم التعليقات اللى بكتبها فى باقى المدونات سلبيه

التعليق اللى كتبته فى مدونة الأستاذ محمد خان إتسبب فى إنه يقفل المدونه

بس أنا ماكنش قصدى أنا كنت كل اللى عايز أقولهوله إنه يستحمل علشان خاطرنا و علشان خاطر كل الناس اللى بتحبه و ده كان قصدى من تمن الشهره

الأستاذ خان فى الفتره القصيره اللى شرفنا فيها بتدويناته بقى حاجه كبيره جداً بالنسبه لنا و أنا كمان عملتله إعلان هنا علشان أى حد يدخل المدونه يعرف مدونة الأستاذ و بالتالى مستحيل أكون أنا السبب فى رحيله

أنا كل اللى قلته كان مجرد رأى و كان هيكون شىء أكثر سعادة بالنسبه لى لو الأستاذ كان قاللى طظ فى رأيك و كمل فى اللى بيكتبه بس بجد اللى عمله الأستاذ ده رد فعل قاسى قوى على اللى كتبته و لذلك أرجو منه أن يسامحنى

السيد الأستاذ محمد خان أتقدم لسيادتكم ببالغ أسفى و إعتذارى و أرجو من سيادتكم قبوله مع خالص تحياتى و تقديرى لكم

طب تصدق إنى بقالى إسبوع عارف إنها هنا و محاولتش أشوفها

و كمان لما كلمتها فى التليفون قفلت معاها بسرعه و خلصت المكالمه كأن هى اللى مكالمنى و أنا مش عايز أكلمها

مش عارف إيه الهبل اللى أنا فيه ده

أكيد أى حد قرأ الكلام الغريب اللى أنا كاتبه ده بيقول علىّ مجنون دلوقتى

و النبى قولوا للأستاذ مش معقول يقفل المدونه بتاعته بسبب واحد مجنون